Vuçiq e ‘humbë kontrollën’ pasi Kosova i vendos reciprocitet Serbisë

Pas varësit të tij, Petar Petkoviq, edhe presidenti i Serbisë, Aleksandar Vuçiq, ka komentuar vendimet e Qeverisë së Kosovës për targat e automjeteve dhe aplikimin e reciprocitetit lidhur me letërnjoftimet për qyetarët e Serbisë që hyjnë në Kosovë.

Pas takimit me të dërguarin e BE-së për dialogun Kosovë-Serbi, Miroslav Lajçak, Aleksandar Vuçiq iu drejtua gazetarëve, duke komentuar vendimet e sotme të Qeverisë së Kosovës.

“Ne jemi gjithmonë të gatshëm për dialog, ndërsa disa të tjerë nuk janë kurrë të gatshëm për dialog përmbajtësor, por kanë mbështetjen e fuqive perëndimore, bëhet fjalë për marrjen e dy vendimeve në institucionet e tyre, njëra është shkurtimi i të drejtës për të hyrë në Kosovë me letërnjoftime… Vendimi tjetër me qëllimin e vetëm për të dëbuar serbët”, tha Vuçiq, para gazetarëve, transmeton Telegrafi.

Vuçiq ka thënë se “nëse Prishtina nuk i bindë serbët që të riregjistrojnë automjetet me targa [RKS], atëherë institucionet e Kosovës do t’ua marrin targat dhe veturat e serbëve”.

“Ata po llogarisin që serbët të largohen nga veriu i Kosovës”, tha Vuçiq.

Vuçiq theksoi se lidershipi shqiptar kinse ka marrë mbështetje nga Britania e Madhe, Gjermania dhe vende të tjera të QUINT-it.

“Me vite po i durojmë gënjeshtrat… Nuk është problem ajo që ata mendojnë se ne jemi budallenj, por se mendojnë se janë shumë të zgjuar”, tha Vuçiq për Perëndimin.

Vuçiq tha se Prishtina po planifikon një “sulm në veri të Kosovës deri më 1 tetor”.

“Na dhanë afat për targat deri në fund të shtatorit, do të thotë se më së voni deri më 1 tetor po planifikojnë sulm të përgjithshëm në veri të Kosovës”, tha presidenti i Serbisë.

Vuçiq pyeti se për çfarë duhet të jetë dialogu Kosovë- Serbi pas vendimeve të tilla të institucioneve të Kosovës.

“Dialog për çfarë? Për çfarë të flasim? Ja, jemi gati, nuk e di për çfarë të flasim”, tha Vuçiq.

Ai ka thënë se Serbia ka përmbushur gjithçka nga marrëveshja e Brukselit, kurse Kosova asgjë.

Qeveria e Kosovës miratoi të mërkurën vendimin për mundësinë e riregjistrimit të veturave me targat e qyteteve në Kosovë – të cilat i lëshojnë autoritetet e Serbisë – në RKS (Republika e Kosovës).

Bëhet fjalë për veturat me targat PR (Prishtinë), GL (Gjilan), PZ (Prizren), KM (Mitrovicë e Kosovës) e kështu me radhë.

Targat e tilla janë hequr në zonat e populluara me shumicë serbe në jug të Lumit Ibër në vitin 2011, pas nënshkrimit të një marrëveshjeje midis Kosovës dhe Serbisë për lirinë e lëvizjes.

Në mbledhjen e Qeverisë së Kosovës, të mërkurën, u miratua edhe udhëzimi për kalimin e pikave kufitare me dokumente personale, të lëshuara nga autoritetet serbe.

Sipas tij, të gjithë ata persona që kanë dokumente personale të lëshuara nga autoritetet serbe, me të hyrë në territorin e Kosovës, do të marrin një certifikatë që i zëvendëson ato dokumente.

Përndryshe, të gjithë qytetarët e Kosovës që hyjnë në territorin e Serbisë, marrin një certifikatë që i zëvendëson dokumentet e tyre personale.

Ndaj këtij vendimi të Qeverisë së Kosovës reagoi Zyra për Kosovën në Qeverinë e Serbisë, duke thënë se “Albin Kurti po i kërcënon me luftë serbët në Kosovë”.

Takimi enigmatik i Memlit me Albinin në sallën C301

Kryeministri i Kosovës, Albin Kurti është takuar me kryetarin e Partisë Demokratike të Kosovës, Memli Krasniqi.

Burime të Nacionale bëjnë të ditur se Kurti dhe Krasniqi janë takuar në sallën me numër C301 të Kuvendit të Kosovës.

Deri më tani nuk dihet arsyet e takimit mes tyre.

Takimi i tyre vjen pas vizitës së emisarit special të BE-së, Miroslav Lajçak në Kosovë dhe takimi të tij me liderët opozitar.

Nacionale ka provuar të kontaktojë edhe me zyrtarë të Qeverisë dhe ata të PDK-së, mirëpo asnjëra palë nuk kanë qenë të qasshëm në thirrjet e gazetës.

“Kosova e rrezikuar nga 48 bazat ushtarake të Serbisë”

Opinionisti dhe ish-gazetari i Washington Post, Jason Rezaian ka publikuar një opinion që lidhet me Kosovën dhe rolin e saj në konfliktin e ideve mes SHBA-së dhe Rusisë, pas shpërthimit të luftës në Ukrainë.

Autori ka bazuar shkrimin e tij edhe në bisedat që i ka zhvilluar me kryeministrin e Kosovës, Albin Kurti dhe e ka cituar disa herë gjatë opinionit që e ka publikuar në The Washington Post.

Ai thotë se rreziku për Kosovën me 2 milionë banorë e me 48 baza ushtarake serbe përreth, është shumë i lartë. Ai citon Kurtin, i cili thotë se Kosova është front ku definohet konfrontimi ideologjik mes SHBA-së dhe Rusisë.

“Për një vend me më pak se 2 milionë banorë, që e ka deklaruar pavarësinë nga Serbia në vitin 2008, rreziku është shumë i lartë. Me 48 baza ushtarake të Serbisë përreth kufirit të Kosovës sipas Kurtit, nuk është çudi e madhe që ai sheh fatin e vendit të tij si një front ku definohet konfrontimi ideologjik i kohës sonë. Ai e konsideron rajonin e tij si një fushëbetejë aktive, por nganjëherë të anashkaluar, në mesin e tensioneve që po rriten ndërmjet Shteteve të Bashkuara dhe Rusisë”, shkruan ai, raporton Gazeta Express.

Ai ka ndarë me lexuesit edhe fragmente të tjera nga biseda me Kurtin dhe tregon çka i ka thënë: “Janë dy pole në botë. Rusia dhe SHBA-ja”, më tha Kurti. “Sulmi i Putinit në Ukrainë është një përpjekje e tij për t’u ulur bashkë me Presidentin Biden për një lloj konference, diçka si Jalta II. Kjo është përshtypja ime. Le ta ndajmë botën sepse po s’e bëmë, do të vazhdojmë të luftojmë… kjo është, besoj unë, çfarë ai dëshiron të thotë.”

Rezaian shpjegon gjithashtu se Kurti i ka thënë se se ai vazhdon të bëjë përpjekje vullnetmirë për de-eskalim me Serbinë, por ato nuk kanë shpjerë askund deri më sot.

“Në zemrën e tensioneve qëndron mos-vullneti i Serbisë për ta njohur Kosovën si një shtet të pavarur dhe sovran”, shkruan tutje ai, teksa citon Kurtin: “S’mund ta njoh një Serbi që s’më njeh. Pra, duhet njohje e ndërsjellë dhe ne jemi gati që të përfshihemi në këtë diskutim”.

Si do të dukej mbrojtja e garantuar për Kosovën, sipas Rezaian, është prezenca e përhershme ushtarake amerikane në Kosovë, por edhe integrim në BE.

“Si do të dukej kjo për Kosovën? Prezencë e përhershme ushtarake amerikane. Anëtarësim në Bashkimin Evropian dhe njohje nga shtetet e mbetura të shtetësisë”, ka shkruar ai.

Ramush Haradinaj: Kurti e Konjufca më të këqinj se Rrahman Morina, ‘ka me i vra Zoti’

Kryetari i AAK-së, Ramush Haradinaj, e ka krahasuar kryeministrin Albin Kurti dhe kryeparlamentarin Glauk Konjufca me kryetarin e Partisë Komuniste të Kosovës në vitet e 90-ta Rrahman Morina.

Duke folur për mospërfshirjen e veteranëve të UÇK-së në Ligjin për Pagën Minimale, Haradinaj tha se liderët e shtetit të Kosovës po veprojnë edhe më keq se politikani komunist.

“Kam kujtu që jam duke jetu te shqiptarët. Nuk më ka shku kurrë mendja që në Kosovë dhe tek shqiptarët vjen dikush si Rrahman Morina që kur e rrit pagën minimale e heq UÇK-në. Unë Rrahman Morinën nuk e kam mbërri, nuk kam qenë këtu, po këta [Albin Kurti dhe Glauk Konjufca] po më duken fytyrë më e keqe kur po i shoh në atë qëndrim”, tha Haradinaj në “Rubikon” të Klan Kosovës.

I pari i AAK-së tutje shtoi se me çështjen e veteranëve të rrejshëm duhet të merren organet e drejtësisë.

“Nuk është në rregull që në emër të disa veteranëve të rrejshëm të dëmtohen gjithë ata njerëz të ndershëm, luftëtarë të zotë, familje të ndershme, njerëz që i kanë me nevojë këto pare, njerëz që i lënë në këtë ekonomi këto pare. Është rrezik çka është duke ba ky njeri. Nuk ka me i shku mirë, besoni e vret Zoti, le t’ia ndal atij që ka, le të m’i ndalë mu që i kam të hyrat e mëedha, por mos i prek ata njerëz, atë kategori, se nuk bën ashtu”.

Reagon ashpër gazetari Baton Haxhiu ndaj Albin Kurtit

T’i themi gjërat troç?

Vetëm akti i parë i tradhtisë u përket përmasave të tmerrit ekzistencial, sepse tradhtitë e tjera pastaj vijnë gjithnjë e më shpesh sa të duken përherë e më të zakonshme. Pra, tani pasi që Albin Kurti e kreu aktin e parë të tradhtisë ndaj vendit me marrëveshjen për energjetikë, kemi për të parë gjithnjë e më shpesh marrëveshje në funksion të krijimit të autonomisë serbe
në Kosovë.

Rreth para një jave, një prej njerëzve më të pandershëm në kontinentin tonë, sa i përket aftësisë për të gënjyer ndër sy dhe shërbyer shefit pa asnjë princip, Besnik Bislimi, paralajmëroi se marrëveshja me Serbinë për energjetikë është shumë afër.

Si fillim, kjo tregoi se Kurti e Bislimi kishin zhvilluar biseda të fshehta, me thika mbi sistemin energjetik të Kosovës, me Vuçiçin e Petkoviçin. Lidhur me këtë marrëveshje, e cila, me siguri nuk është lidhur brenda një nate, ata nuk kanë dhënë llogari as para opinionit publik, as para Kuvendit të Kosovës.

Tufa e mashtruesve të pacipë të VV-së, që kanë çuar njerëz në varr e nëpër burgje me idenë e demokracisë së drejtpërdrejtë, ia punuan prapa shpine një Kosove duke e vendosur para aktit të kryer me marrëveshjen për energjetikë.

Për më shumë, ata bënë një gabim të tmerrshëm strategjik, duke e rikthyer dialogun nga faza përfundimtare për njohje të ndërsjellët, në biseda teknike, siç është rasti për targa dhe energjetikë. Emëruesi i përbashkët i këtyre dy marrëveshjeve është trajtimi i privilegjuar i Veriut të Kosovës nga pjesa tjetër e Republikës së Kosovës.

Pra, me çdo standard të VV-së, aktivistët e të cilës deri dje i kanë thyer dhëmbët nëpër rrugë gjoja se për çlirim të Kosovës e sot janë shndërruar në nënpunës të nënshtruar për një rrogë mujore duke arsyetuar çdo vendim kundër vendit të tyre, nga sot e tutje, Besnik Bislimi e Albin Kurti janë tradhtarë të kombit shqiptar.

Ata kanë tradhtuar popullin, i cili ua dha mbi 50% të votave duke ia thyer premtimin se do t’i rivlerësojnë marrëveshjet e Brukselit nga dialogu i dëmshëm. Sot, ndërkaq, për një grusht pushtet, ata me një mburravecëri të paparë zgërdhihen teksa e shesin marrëveshjen për energjetikë si sukses madhor të qeverisë së tyre.

Po, pikërisht të njëjtën marrëveshje nga ana përmbajtësore, të cilën Albin Kurti e quante që e gjymton shtetësinë, dëmton ekonominë dhe dezintegron energjetikën e Kosovës.

Asgjë nuk ka ndryshuar sot vetëm faktit që Albin Kurtit i është përmbushur epshi i papërmbajtshëm për pushtet dhe po i pëlqen hajnia e paskaj në bashkëpunim me Xhelal Sveçlen, Haki Abazin (këtë hajdut të përmasave botërore), Liburn Aliun, Hysen Durmishin, mes shumë të tjerëve.

Janë pikërisht kjo bandë kriminale që kanë manipuluar veçanërisht të rinjtë e Kosovës me fushata: bojkotoni produktet e Serbisë, rezoluta kundër importit të prodhimeve serbe, vendosje të reciprocitetit me Serbi, që sot nuk e përmendin fare faktin se kanë thyer çdo rekord sa i përket vëllimit tregtar dhe ekonomik me Serbinë.

Sot, pas kësaj marrëveshje, unë as nuk mund ta përfytyroj se si një aktivist i ndershëm i VV-së me ideale të shëndosha (nëse ka mbetur ndonjë i tillë), ndihet pasi shefi i tij ka nënshkruar një marrëveshje ku kompania shtetërore serbe, JP Elektroprivreda Srbij Beograd, e udhëhequr nga mafiozi çetnik, Milorad Grçiq, nëpërmjet Elektroserver, përfaqësuar nga një prej kuadrove më të vyer kriminal të strukturave paralele, Boban Novakoviq, do të bëhet hisedare në sistemin energjetik të Kosovës. Kjo është politikisht ndarje e sovranitetit e funksionalisht ndarje e sistemit energjetik me Serbinë.

Ata që kanë një pikë moral duhet të largohen menjëherë, të tjerët normalisht do të vazhdojnë duke i thurur lavde e elozhe i cili me recitale patriotike i futi nën sqetull të Aleksandër Vucicit e Milorad Grçiqit. Mafiozi Martin Berishaj, i cili ka një përvojë të madhe ndërmjetësimesh në marrëveshjet mes Albin Kurtit e pinjollëve të Rankovicit e Stanishiqit në sektorin e energjisë, duhet të ketë edhe informacion të holluar për këtë çështje. Prandaj, ai duhet ftuar urgjentisht nga prokuroria si pjesë e një hetimi kriminal lidhur me motivet dhe interesat që kanë shtyer Qeverinë për ta ndarë sistemin energjetik të Kosovës si me thikë.

Nga ana tjetër, njeriu që deri dje refuzoi Ballkanin e Hapur me idenë se Serbia nuk e njeh Kosovën, sot ja fali Serbisë një pjesë vitale të energjetikës me një marrëveshje ku nuk përmendet fare fjala Republikë kur bëhet fjalë për Kosovën. Kjo megjithatë nuk është më e keqja. Kushdo që bën lexim teknik të kësaj marrëveshje nuk e ka kuptuar thelbin e gjësë. Pak a shumë, lajmi më i rëndësishëm është se Albini, sikurse ka thyer çdo besë të dhënë deri më sot, ka filluar t’i zbatoj marrëveshjet e arritura me Serbinë nga fillimi i dialogut e këndej.

Kjo i bie që marrëveshja për energjetikë është vetëm pregatitje e terrenit për zbatim të asociacionit të komunave me shumicë serbe në një të ardhme shumë të afërt. Kjo edhe më tutje i bie se ai ka filluar ndarjen e resurseve me Serbinë për t’i vënë nën ombrellën e autonomisë së Serbisë nëpërmjet Asociacionit. Kjo do të jetë pjella më e shëmtuar e kumarisë së tij me Aleksandër Vucic, me të cilin shahen në media kohë pas kohe për t’iu hedhur sy njerezve të këtij vendi, e ndajnë resurset e sistemit të energjisë së Kosovës me marrëveshje gjentëllmenësh.

Sa për të përmbushur zellin e tij sadist, ai ua hedhi shqiptarëve para syve, një deputete të papjekur, mendjelehtë e që s’merr gjë vesh nga puna e saj, Jeta Statovci, për ta përshëndetur përzemërsisht arritjen e marrëveshjes për autonominë energjetike të Serbisë në Kosovë. Kjo tregon se deri në ç’shkallë ka arritur degradimi politik në Kosovë, kur marrëveshja e ndarjes së energjetikës së vendit, duhet të arsyetohet nga një kërkushhiçe.

Pjesa tjetër, ndërkaq, është punë e njohur. Lumiri kur vie puna te çëshjet e mëdha me Serbi zakonisht e mbyllë gojën sepse e di shumë më mirë se ne me çfarë punë merret një pjesë e familjes së tij. Ndërkohë Memli Krasniqi nuk u ndie i gjallë për shkak të shumë kusureve të tij që ia ka zbuluar Faton Peci e Albin Kurti, edhe për shkak të përcaktimit të tij të prerë për ta tjetërsuar PDK-në në një klub të përdalë gastronomësh. Si ka mundësi, Partia Demokratike e Kosovës, pasardhësja e UCK-së, të shitet deri në këtë ditë e të tmerrohet deri në palcë nga një Albin Kurt, i cili ua ndajti sistemin energjetik të Kosovës ndër sy? Këto janë pasoja kur braktisen idealet e partia në emër të qytetarisë iu besohet pianecëve, narkomanëve dhe tenderomanëve profesionist.

Sot ka filluar praktikisht hyrja e kompanive shtetërore të Serbisë në sistemin energjetik të Kosovës. Hapi i rradhës është formalizimi i autonomisë së serbëve – kush e di me çfarë emërimi të gjetur nga Petkoviq dhe bashkëpunëtori i tij në Kosovë, Bislim Bislimi – në Republikën e Kosovës.

Kjo pra nuk është veç tradhti, sepse nuk është një akt. S’janë as veç bashkëpunëtorë të Serbisë, sepse bashkëpunimi është një proces me ndërmarrje të përbashkët të dy palëve. Kjo ftesë e një pjese të Serbisë në territorin e Kosovës është tëhuajsim i krejtësishëm. Kjo është të mos ekzistosh si palë fare dhe dorëzim total i vetes.

Kështu do shkruante sot Albin Kurti nëse kryeministri s’do ishte ai.

“Nëse marrëveshjet për energjinë janë të mira, meritat u takojnë qeverive Thaçi dhe Mustafa”

Analisti politik Jusuf Thaçi ka reaguar pas arritjes së marrëveshjes së sotme të Qeverisë së Kosovës me atë të Serbisë për energjinë.

Thaçi përmes një shkrimi në rrjetin social Facebook tha se nëse marrëveshjet për energjinë të vitit 2013 dhe 2015 janë të mira atëherë, sipas tij, meritat I takojnë qeverive të Thaçit e Mustafës.

Ndërsa, sipas tij, nëse këto marrëveshje janë të dëmshme për Kosovën dhe arrihen të realizohen në Qeverinë Kurti, atëherë e bartin të tri qeveritë e sipër-përmendura.

“Veçse, edhe nëse e marrim si të mirëqenë faktin se këto marrëveshje kanë qenë një fakt i kryer për Qeverinë Kurti, meqë LVV i ka kritikuar këto marrëveshje në të kaluarën, atëherë Qeveria Kurti duhet të jetë korrekte me pararendëset e saj, siç e pamë sot korrektësinë e partive opozitare parlamentare (PDK, LDK dhe AAK që kanë qeverisur më herët) në lidhje me marrëveshjen e sotme”, shkroi Thaçi.

Ndryshe, kryeministri i Kosovës, Albin Kurti, është deklaruar lidhur me arritjen e marrëveshjes mes Kosovës e Serbsë për faturimin e energjisë në veri.

Arritjen e kësaj marrëveshje, Kurti e ka quajtur lajm të mirë dhe tha se është rezultat i punës së Qeverisë që ai udhëheqë.

Shqipëri-Kosovë pa kufij, ja marrëveshja që do nënshkruhet.

Ministri i Brendshëm Bldi Çuçi ka prezantuar sot marrëveshjen që do nënshkruhet për krijimin e lehtësirave të kalimit në kufirin Shqipëri-Kosovë dhe anasjelltas.

Ministri Çuçi tha “Protokolli i parë që do nënshkruajmë me homologun Svelça që përgjatë periudhës së verës dhe gjatë fundjavave kur ka fluks lëvizjeje nga të dyja krahët ne do ta lehtësojmë plotësisht. Nëpërmjet protokollit të parë që do nënshkruajmë do përcaktojmë që prej 1 qershorit deri në 1 shtator, për çdo fundjavë dhe çdo ditë feste shtetërore në kufijtë tanë shtetasit e Kosovës dhe Shqipërisë do kalojnë pa qenë nevoja e regjistrimit nga organet kufitare në mënyrë që të mos krijohet asnjë radhë apo vonesë për qytetarët në të dyja anët”.

Rama kerkon mbledhjen e dy kuvendeve.

Ai këtë propozim e bëri meqë është afër 110 vjetori i pavarësisë së Shqipërisë, “në funksion të optimizmit që kthehet në entuziazëm”.

Rama tha se nëse dakordohen kryesitë e dy kuvendeve, ai dhe Kurti do ta adresojnë këtë dhomë të përbashkët.

Ai tha se slogani “të përbashkuar”, materializohet në Kuvendin e Përbashkët mes dy qeverive.

Kurti tha se tani Kosova dhe Shqipëria mund ta lexojnë më qartë gjendjen e krijuar në rajon e botë dhe tha se “përcaktimi ynë është më i thjeshtë”.

“Prandaj, edhe këto mbledhje të qeverisë tingëllojnë më të vërteta e më efektive sesa më parë”, tha ai.

Kurti foli më tej se si duhet të jetë bashkëpunimi rajonal.

Kurti – Ramës: Bashkëpunimi në rajon arrihet duke i zgjidhur problemet në fillim, jo në fund.

“Bashkëpunimi dhe integrimi dhe zhvillimi i qëndrueshëm në gjithë rajonin sigurohet duke i zgjidhur problemet politike në fillim dhe jo në fund. Lënia për fund dhe mbajtja pezull e zgjidhjes së problemeve esenciale politike mban pezull mosbesimin e ndërsjellë social”, tha kryeministri.

Besimi social, Kurti tha se luan rol të madh këtu.

Mbërrin Rama, Kurti e pret me buzëqeshje

Sesioni plenar i mbledhjes së dy qeverive është planifikuar të nis në orën 11:15.

Më pas, është planifikuar një konferencë për shqyp e kryeministrit të Kosovës Albin Kurti dhe homologut të tij shqiptar, Edi Rama.

Marrëdhëniet e ftohta të liderëve nuk i përjashtojnë marrëveshjet e ndryshme që nënshkruhen çdoherë kur organizohen mbledhje të përbashkëta. Të tilla do të ketë edhe sot