Bekim Jashari dënohet me 1 mijë e 800 euro gjobë, pas ankesës në PZAP

Paneli Zgjedhor për Ankesa dhe Parashtresa ka pranuar ankesën e PDK-së, dega në Skenderaj dhe ka dënuar me gjobë kandidatin Bekim Jashari për shkak të thyerjes së heshtjes zgjedhore.

Bekim Jashari është dënuar me një gjobë prej 1 mijë e 800 euro.

Në vendimin e PZAP thuhet: “Pranohen ankesat e paraqitura nga PDK me seli në Prishtinë, dega në Skenderaj, ndërsa subjektit Lista e pavarur Bekim Jashari i shqiptohet gjobë në vlerë 1,800 euro për shkak të shkeljes së Kodit të Mirësjelljes për Subjektet Politike, Mbështetësit e tyre, Kandidatët, me rastin e thyerjes së heshtjes zgjedhore përmes rrjeteve sociale”.

Jashari ka të drejtë ankese për këtë vendim të PZAP.

I njëjti ka njoftuar se ka deponuar mbi 10 ankesa në PZAP për manipulime në zgjedhje në Komunën e Skenderajt.

Rezultati preliminar në Skenderaj nxjerr fitues pa balotazh kandidatin e PDK-së, Fadil Nura.

E FUNDIT: Bekim Jashari nuk e pranon humbjen

Kandidati për kryetarë të Skenderajit, Bekim Jashari nuk e ka pranuar humbjen e pësuar nga PDK në Skenderaj.

Jashari ka thënë se gjatë ditës janë raportuar parregullsi të mëdha, shantazhe e presion tek votuesit, shkruan lajmi.net.

“Nga vëzhguesit tonë në vendvotime deri me tani janë raportuar për raste të fletëvotimeve të pa vulosura në rreth 11 Qendra të Votimit, situatë kjo e cila dëshmon për ekzistencën e blerjes se votës me sistemin e njohur si “treni bullgar””, ka thënë Jashari.

Ai ka thënë se do të presin numërimin e votës së fundit për të dalë me njoftim të ri.

Postimi i plotë:

Të nderuar qytetarë,

Mbështetja juaj në çdo takim, sondazhet e Exit Polleve në njërën anë dhe rezultati zgjedhor sipas KQZ-së, është me mospërputhje të mëdha.

Gjatë ditës kemi raportuar për parregullsi të mëdha si blerje votash, shantazhe e presion tek votuesit.

Nga vëzhguesit tonë në vendvotime deri me tani janë raportuar për raste të fletëvotimeve të pa vulosura në rreth 11 Qendra të Votimit, situatë kjo e cila dëshmon për ekzistencën e blerjes se votës me sistemin e njohur si “treni bullgar”.

Po ashtu mungesa e komisionerëve nga subjekti jonë politik ka dëmtuar jashtëzakonisht shumë votën tonë.

Idealit dhe Drenicës duket se me manipulime, blerje votash iu vjedh fitorja dhe e ardhmja nga ata që janë pasuruar duke vjedhur Kosovën.

Pas mbledhjes së fakteve të shumta për manipulime do të kërkojmë drejtësi për manipulimet e bëra në këto zgjedhje në Skenderaj.

Ne do të presim numrin e votës se fundit për të dalur me njoftimin e ri.

I juaji çdo herë Bekim Jashari!.

LIVE: Rezultati në Skenderaj [FOTO]

[20:46]- Numëri i votave në qytetin e Skenderaj po vazhdon, transmeton TeleshkronjaPost.

Deri tani, kandidati i PDK-së, Fadil Nura prin me 62.12 për qind të votave, ndërsa Bekim Jashari me 36.72 për qind të votave.

[20:19]- Po vazhdon numërimi i votave në Skenderaj, ku deri tani kandidati i PDK-së, Fadil Nura po prin me 58.91 për qind të votave.

Ndërsa Bekim Jashari po merr 39.69 për qind, raporton Gazeta Express.

[20:05] – Ka nisur numërimi i votave në Skenderaj, ku nga të dhënat e fundit të KQZ-së, kandidati i PDK-së, Fadil Nura po prin me 59.34 për qind.

Ndërsa kandidati Bekim Jashari renditet i dyti deri tani me 39.34 për qind.