Nervozohet Vuçiq: Nuk do të ketë Kosovë të pavarur

Presidenti i Serbisë, Aleksandar Vuçiq, i pyetur sot nga një gazetar që të komentojë deklaratën e të dërguarit special të Gjermanisë për Ballkanin Perëndimor, Manuel Sarrazin.

Sarrazin tha se nuk do ta lejojë “Republikën Srpska” në Kosovë, deklaroi se rreth kësaj vendosin serbët dhe shqiptarët, dhe i la porosi diplomatit gjerman që nuk do të ketë as pavarësi të Kosovës ashtu siç kanë planifikuar.

“Nuk e kam ditur që ai ka thënë këtë – se nuk do ta lejojë, kam menduar se për këtë vendosin serbët dhe shqiptarët. Nuk e kam ditur që rreth kësaj vendosin gjermanët, por është mirë që Sarrazin atë e tha publikisht, pasi gjermanët veçse kishin vendosur tashmë për disa plane, mirë është që ai na e tha këtë publikisht”, deklaroi ai, shkruan Tanjug.

Komisionari i BE-së Varhelyi paralajmëron kërkesa shtesë për liberalizimin e vizave

Një udhërrëfyes shtesë për liberalizimin e vizave për Kosovën paralajmëroi komisionari i BE-së për Fqinjësi dhe Zgjerim, Oliver Verhelyi, në debatin që u zhvillua të hënën në Parlamentin Evropian.

Temë e diskutimit ishte zgjerimi i bllokut pas agresionit të Rusisë në Ukrainë.

Përveç deputetëve nga Parlamenti Evropian, morën pjesë edhe deputetë nga parlamentet kombëtare të shumë shteteve anëtare të BE-së, por edhe të vendeve kandidate dhe të kandidatëve potencialë.

Derisa u fol për Ballkanin Perëndimor, Varhelyi tha se Kosova është në pritje të liberalizimit të vizave dhe se duhet ecur përpara me këtë çështje.

Ai tha se janë disa fusha, si lufta kundër krimit të organizuar, anti-trafikimi dhe kërkesat për azil, ku “shtetet anëtare duan rezultate të qarta”.

“Në këto kohëra të vështira dhe në kontekstin e ndryshimeve gjeo-politike, prioriteti ynë mbetet Ballkani Perëndimor”, tha Varhelyi.

“Jemi të gatshëm t’i ndihmojmë Kosovës që, së bashku me shtetet anëtare, të vendosim një udhërrëfyes për adresimin e shqetësimeve specifike. Autoritetet e vendeve anëtare, agjencitë e rendit dhe ligjit, forcat e policisë kanë nevojë të angazhohen në terren për t’i ndihmuar Kosovës. Nga ana jonë, ne jemi të gatshëm t’i japim Kosovës gjithë ndihmën financiare, teknike dhe politike për këtë proces”, shtoi ai.

Kosova është vendi i vetëm në Ballkanin Perëndimor që nuk gëzon liberalizim vizash me BE-në.

Qeveria e Kosovës thotë se ka plotësuar çdo kriter nga gjithsejtë 95 sa i ka vendosur BE-ja në udhërrëfyesin për liberalizim.

Megjithatë, procesi është penguar vazhdimisht nga disa shtete anëtare të BE-së, sidomos Franca, e cila ka shprehur rezerva për lëvizjen e lirë të kosovarëve.

Sa i përket dialogut për normalizimin e marrëdhënieve midis Kosovës dhe Serbisë, Varhelyi tha se të dyja vendet duhet të dëshmojnë përkushtim të qartë në kryerje të detyrave.

“Po shohim se Serbia është në një pozitë të vështirë në rrethanat dhe sfidat ekzistuese gjeo-politike. Duhet ta pranojmë këtë. Çështja e sanksioneve [kundër Rusisë] është vetëm një prej simptomave të problemeve. Ne jemi krejtësisht të gatshëm ta mbështesim Serbinë në përshtatjen e mëtejme me politikën e BE-së, lidhur me luftën e Rusisë në Ukrainë. Por, kemi nevojë që edhe Serbia të marrë obligime të reja”, tha Varhelyi.

Serbia, aleate e Rusisë, është vendi i vetëm në Ballkan që nuk u është bashkuar sanksioneve të Perëndimit kundër Rusisë, për shkak të pushtimit të Ukrainës.

Varhelyi u bëri thirrje vendeve të rajonit që ta rrisin edhe bashkëpunimin mes vete, nëse, siç tha, duan të përfitojnë nga plani për investime dhe ekonomi i Bashkimit Evropian.

“Pa një bashkëpunim të duhur rajonal, qoftë përmes Procesit të Berlinit, qoftë përmes tregut të përbashkët rajonal apo iniciativës së Ballkanit të Hapur, shtetet e rajonit, thjesht, nuk mund t’i gëzojnë përfitimet e planit të investimeve në Ballkan”, tha zyrtari i lartë evropian.

Duke folur për nisjen e negociatave për anëtarësimin e Maqedonisë së Veriut dhe Shqipërisë në BE, Varhelyi tha se, brenda ditësh, do të mund të zhvillohet konferenca ndërqeveritare e BE-së me këto dy vende.

Ai tha se “të gjitha pengesat janë hequr”, duke përmendur këtu votimin në Kuvendin e Bullgarisë për heqjen e vetos ndaj Maqedonisë së Veriut.

Bullgaria, me vite, ka penguar ecjen përpara të Maqedonisë së Veriut, për shkak të disa mosmarrëveshjeve për historinë dhe gjuhën.

Javën e kaluar, Parlamenti bullgar ka votuar për heqjen e kësaj pengese, në bazë të një propozimi të Presidencës së Francës, por nuk është e qartë se si do të zhvillohen gjërat, pasi Maqedonia e Veriut, fillimisht, e ka hedhur poshtë atë propozim.

Shqipëria ka mbetur pas në hapjen e negociatave, sepse disa shtete të BE-së nuk duan që ajo të ndahet nga paketa me Maqedoninë e Veriut.

Verhelyei tha se ka sinjale pozitive për t’i dhënë statusin e vendit kandidat Bosnje e Hercegovinës, që është përmendur edhe në konkluzat e samitit të fundit të BE-së në Bruksel, por shtoi se ky shtet duhet t’i përmbushë paraprakisht disa reforma.

Për Malin e Zi, ai tha se në BE presin rikthimin e dialogut të brendshëm politik dhe stabilitet institucional.

Kryetari i Komisionit për punë të jashtme në Parlamentin Evropian, David McAlister, tha se ky debat është në një moment shumë të duhur, pas vendimit në samitin e fundit të BE-së – të mbajtur javën e kaluar – për t’i dhënë statusin e vendit kandidat Ukrainës dhe Moldavisë. Javën e kaluar në Bruksel është mbajtur edhe një takim i përbashkët i liderëve të vendeve të BE-së dhe atyre të Ballkanit Perëndimor.

Deputeti nga Kroacia, Tonino Piculla, i cili është emëruar si raportues i një strategjie të re të zgjerimit të BE-së, tha se BE-ja duhet të japë po ashtu shembuj konkretë për të avancuar zgjerimin me Ballkanin Perëndimor.

“Samiti i fundit i BE-së krijoi një valë të re të apatisë në Ballkanin Perëndimor. Vetëm me nisjen e negociatave me Shqipërinë dhe Maqedoninë e Veriut, si dhe me heqjen e vizave për qytetarët e Kosovës, BE mund të dëshmojë se në vazhdimësi, e jo vetëm në raste periodike, është në nivel të sfidave dhe faktor i rëndësishëm gjeo-politik”, tha Piculla.

Gjashtë vendet e Ballkanit Perëndimor janë në faza të ndryshme të integrimit evropian. Negociatat për anëtarësim i kanë nisur Mali i Zi dhe Serbia. Maqedonia e Veriut dhe Shqipëria mbeten në pritje të nisjes së tyre, ndërsa Kosova dhe Bosnje e Hercegovina kanë vetëm marrëveshje stabilizim asociimi me BE-në, që është hapi i parë drejt anëtarësimit në bllok.

“Kosova e rrezikuar nga 48 bazat ushtarake të Serbisë”

Opinionisti dhe ish-gazetari i Washington Post, Jason Rezaian ka publikuar një opinion që lidhet me Kosovën dhe rolin e saj në konfliktin e ideve mes SHBA-së dhe Rusisë, pas shpërthimit të luftës në Ukrainë.

Autori ka bazuar shkrimin e tij edhe në bisedat që i ka zhvilluar me kryeministrin e Kosovës, Albin Kurti dhe e ka cituar disa herë gjatë opinionit që e ka publikuar në The Washington Post.

Ai thotë se rreziku për Kosovën me 2 milionë banorë e me 48 baza ushtarake serbe përreth, është shumë i lartë. Ai citon Kurtin, i cili thotë se Kosova është front ku definohet konfrontimi ideologjik mes SHBA-së dhe Rusisë.

“Për një vend me më pak se 2 milionë banorë, që e ka deklaruar pavarësinë nga Serbia në vitin 2008, rreziku është shumë i lartë. Me 48 baza ushtarake të Serbisë përreth kufirit të Kosovës sipas Kurtit, nuk është çudi e madhe që ai sheh fatin e vendit të tij si një front ku definohet konfrontimi ideologjik i kohës sonë. Ai e konsideron rajonin e tij si një fushëbetejë aktive, por nganjëherë të anashkaluar, në mesin e tensioneve që po rriten ndërmjet Shteteve të Bashkuara dhe Rusisë”, shkruan ai, raporton Gazeta Express.

Ai ka ndarë me lexuesit edhe fragmente të tjera nga biseda me Kurtin dhe tregon çka i ka thënë: “Janë dy pole në botë. Rusia dhe SHBA-ja”, më tha Kurti. “Sulmi i Putinit në Ukrainë është një përpjekje e tij për t’u ulur bashkë me Presidentin Biden për një lloj konference, diçka si Jalta II. Kjo është përshtypja ime. Le ta ndajmë botën sepse po s’e bëmë, do të vazhdojmë të luftojmë… kjo është, besoj unë, çfarë ai dëshiron të thotë.”

Rezaian shpjegon gjithashtu se Kurti i ka thënë se se ai vazhdon të bëjë përpjekje vullnetmirë për de-eskalim me Serbinë, por ato nuk kanë shpjerë askund deri më sot.

“Në zemrën e tensioneve qëndron mos-vullneti i Serbisë për ta njohur Kosovën si një shtet të pavarur dhe sovran”, shkruan tutje ai, teksa citon Kurtin: “S’mund ta njoh një Serbi që s’më njeh. Pra, duhet njohje e ndërsjellë dhe ne jemi gati që të përfshihemi në këtë diskutim”.

Si do të dukej mbrojtja e garantuar për Kosovën, sipas Rezaian, është prezenca e përhershme ushtarake amerikane në Kosovë, por edhe integrim në BE.

“Si do të dukej kjo për Kosovën? Prezencë e përhershme ushtarake amerikane. Anëtarësim në Bashkimin Evropian dhe njohje nga shtetet e mbetura të shtetësisë”, ka shkruar ai.

Pergjigjja e papritur e Rames kur flet për marrëdhëniet e Serbisë me Rusinë dhe Perëndimin

Kryeministri i Shqipërisë, Edi Rama, ka folur për marrëdhëniet e shqiptarëve me Serbinë. Ai në promovimin e librit të Enver Hoxhajt, ka thënë se Serbia tani ndodhet mes dy zjarreve dhe se ai beson që Serbia duhet të mbajë distancë të mjaftueshme me Rusinë në mënyrë që Ballkani të mos përfshihet nga “flaka ruse”. Shkruan Teleshkronja.

Ai thotë se Serbia është e varur nga Rusia në shumë aspekte dhe si e tillë nuk mund të pozicionohet haptas kundër saj.

“Ne nuk kemi asnjë interes që Serbia të radikalizohet dhe do të bëjmë çmos që në këtë situatë kur Serbia është në situatë mes dy zjarreve, nga njëra anë presioni ndaj Rusisë, që lidhet me mundësinë që ka Rusia ta shtrëngojë Serbinë, pasi që e furnizon me gaz e naftë e shumë të tjera. Në anën tjetër me presionin e Perëndimit. Të shtyn sa më shumë në anën e një kuptimi të drejtë të asaj që çfarë duhet të presim nga Serbia. Kush pret nga Serbia që të hidhet në flakë për perëndimin nuk e di çfarë është kjo. Ajo nuk mundet, pasi nuk ka asnjë mundësi ta bëjnë këtë pasi përbëhet nga një popull ku 80% mendojnë se Putini ka të drejtë”, tha ai.

Tutje Rama shtoi se Kosova nuk është e detyruar t’i kthehet luftërave dhe se në rast që dikush “e detyron atë”, atëherë Shqipërinë e ka mbrapa.

“Por në anën tjetër besoj e kanë të qartë, që Serbia mund të qëndrojë në distancë nga Rusia që flaka e luftës mos të vijë këtu. Këtu është thelbi i tradhtisë sime, tradhti për të cilën nuk jam pishman. Mendoj se ne kemi vuajtur boll. Kur them ne, nuk them unë. Në radhë të parë Kosova ka vuajtur shumë, nga luftërat, flaka e shkatërrimet. Nuk ka nevojë më të shkojë në atë drejtim, përvec nëse e detyrojnë. E nëse e detyrojnë , e detyrojnë edhe Shqipërinë pasi ne jemi një. E për sa kohë nuk na detyrojnë, nuk kemi pse i shkojmë asaj rruge”, shtoi ai.

Sali Berisha: Edi Rama ka marrë udhëzime nga Serbia që të rrëzojë Kurtin

Ish-presidenti i Shqipërisë, Sali Berisha, ka komentuar vizitën e kryeministrit të Shqipërisë, Edi Rama, në Kosovë.

Berisha në një status të gjatë në Facebook ka thënë se Rama ka shkuar në Kosovë me një mision të deleguar nga Serbia në Samitin e Ohrit.

“Pas samitit të cilin e ka quajtur, antishqiptar dhe antieuropian, të Ohrit ku presidenti i Serbisë, Aleksandar Vuçiq me urdhër të Putinit mblodhi vasalet e tij të Tiranas dhe Shkupit për avancimin e Ballkanit serbo-rus ne kundërvënie të hapur të procesit të Berlinit duket se Edi Rama ka marrë detyra të reja nga Beogradi. Konkretisht duket se Edi Rimës i është ngarkuar detyrë në një akt të ri antishqiptar të punojë ngushtë me albanofobë e serbofilë në Kosovë për rrëzimin e Qeverisë Kurti, qeveri e cila me qëndrimet konsguente kundër projektit ruso -serb të Ballkanit të Hapur mbrojti dhe po mbron me konseguence interesat e kombit shqiptar por edhe të Bashkimit Evropian dhe NATO-s në rajon”, ka shkruar ai.

Ai ka shkruar se e dënon, siç e ka quajtur, misionin e ri antishqiptar të Ramës.

“Me këtë rast duke dënuar me ashpërsinë më të madhe misionin e ri antishqiptar të Edi Ramës të ngarkuar në Beograd, paralajmëroj vasalin e mjerë të serbomadhit Vuçiq të heqë dorë nga skenarët e Beogradit kundër qeverisë së Kosovës, pasi në të kundërtën do të marrë ndëshkimin e merituar nga mbarë kombi shqiptar”, ka shkruar ai.

Ballkani i Hapur: Edi Rama thotë se është për të qeshur, e trajtojnë si instrument që do ta marri Serbia tregun

Kryeministri i Shqipërisë Edi Rama, ka thënë se është ndjerë i nderuar me pritjen që i është bërë sot nga korporata ‘’Devolli’’, me vizitat e tij që bëri në fabrikat M&Sillosi, por edhe në Comodita.

Rama tha se puna që bëhet në këto dy fabrika prodhimi, është një ekselencë, të cilën sipas tij, Shqipëria shpreson ta ketë një të tillë për të shfrytëzuar gjithë logjistikën e portit atje, përcjell klankosova.tv.

”Shqipëria sot është në një fazë të re zhvillimi. Dhe në një moment ku realisht ja vlen të investohet, posaçërisht në turizëm dhe patjetër dhe pastaj edhe në gjithë linjat e prodhimit por mbi atë të përpunimit në fushën e ushqimit”.

”Sot ne patëm mundësinë që të shohim një nga ekselencat jo të Kosovës dhe Shqipërisë, por të krejt rajonit tonë, tek M&Sillosi dhe këtu tek një tjetër ekselencë e eksportit, që e ka zërin e vet deri në ShBA dhe shpresojmë që së shpejti ta kemi një tjetër fabrikë në Shqipëri, për të shfrytëzuar gjithë logjistikën e portit atje”.

”Dua t’ju them që ne jemi shumë të interesuar që të kemi një prani më të madhe të sipërmarrje të Kosovës në Shqipëri. Sepse pavarësisht që vizitorët e huaj janë potencial, ne na duhen kampionët shqiptarë, e natyrisht jo të gjithë shqiptarët jetojnë në Shqipëri dhe investojnë në Shqipëri. Do të ishte një privilegj i madh për Shqipërinë t’ju kishim ju atje. Së shpejti në javë të ardhshme do ta rrisim shkallën e pagave të pataksuara”.

Tutje kryeministri Edi Rama foli edhe për çështjen e Ballkanit të Hapur, për të cilin u shpreh se me këtë ide, secili do ta merrte atë që i takon, përcjell klankosova.tv.

”Është shumë për të qeshur dhe për të qarë kur Ballkanin e Hapur, e trajtojnë si një instrument që do marri Serbia tregun. Por, po të shikosh volumin tregtar të Serbisë, rritjen më të madhe e ka këtu. Pavarësisht gjithë pengesave, problemeve, dhe gjithë marrëdhënieve që janë dhe në këtë rast përgjegjësia është në anën e Serbisë është në anën e Kosovës. Praktikisht volumi më i madh tregtar është këtu dhe rritja më e madhe është këtu”.

”Pra, nuk është çështja se Ballkani i Hapur do bëjë ndonjë gjë tjetër përveç se do krijojë hapësirë shumë më të madhe për të gjithë. Do të zgjerojë shumë me tepër frymëmarrjen e ekonomike për të gjithë, dhe secili do të marri pjesën e vet të asaj që i takon. Ti nuk mund të nisesh si e si të pengosh tjetrin, pavarësisht se për vete mund të vuash shumë më tepër. Ti duhet të nisesh si e si të fitosh për vendin tënd, pastaj të tjerët të fitojnë pjesën e tyre. Kjo nuk është diçka që duhet ta pengosh, apo që do duhej të ishte shqetësimi yt fare”.

”Sa më mirë të jenë ekonomikisht fqinjët, aq më mirë shkojnë punët edhe në drejtimin politik”.

“Pse po armatoset Serbia, mos do të sulmojë? Shqipëria e Kosova të kenë kujdes”

Ish-Presidenti i Republikës së Shqipërisë, Alfred Moisiu, tha se Shqipëria dhe Kosova duhet të bëjnë kujdes nga sjellja e Serbisë dhe nxitimit të saj për t’u pajisur me armatim.

“Ne, Shqipëria dhe Kosova, vërtetë jemi paqësorë, por duhet të mendojmë edhe më të keqen. Armatoset Serbia, por pse armatoset? Pyetja është ajo që armatoset, mos do të sulmojë? Mos e ka në mendje?”, tha Moisiu në një intervistë për KosovaPress. “Ne duhet të jemi të kujdesshëm dhe të marrim masa, edhe Kosova dhe Shqipëria, duhet të jemi më seriozë. Kujt ia merrte mendja se Rusia do të sulmonte Ukrainën, asnjë njeri. Janë vende autokrate, edhe Serbia është vend autokrat, nuk është në peshën e Rusisë, por është”.

Ish-Presidenti Moisiu tha gjithashtu se Bashkimi Europian nuk duhet të përkëdhelë Serbinë dhe duhet ta detyrojë që të njohë pavarësinë e Kosovës

. “E kanë të vështirë këtë (njohjen reciproke), nuk po hy arsyet pse, ata e dinë më mirë. Por ai është maksimumi që ne kërkojmë, prandaj duhet hap pas hapi. Këtë punë Europa e ka në dorë më shumë se kushdo për të shtrënguar Serbinë dhe mos të përkëdhelin. Pasi e kanë përkëdhelur deri tani, konsideronin se më mirë është me pas këndej Serbinë se nga Rusia”, thotë ai.

Sipas tij, dialogu me Serbinë duhet të vazhdojë për të arritur vetëm një epilog përfundimtar dhe jo për të zvarritur procesin. “Edhe rusët edhe serbët kanë të njëjtën gjuhë, kjo nuk është e rregullt dhe kjo na shqetëson. Ne i themi fqinjëve tanë, siç kemi jetuar bashkë, do të vazhdojmë të jetojmë, por si komshi. Unë përdor shpesh një fjalë, shokun dhe mikun mund të zgjidhesh, por komshiun ta jep Zoti. E rëndësishme është që të gjejmë mënyrën si të merremi vesh dhe të jetojmë në paqe. Sigurisht kjo nuk është aq e thjesht sa thuhet, por duhet të arrihet.

Pasi për të zgjidh problemet, dy rrugë ka, ose me armë, ose bisedojmë. Me armë, lufta këtu është bërë, tani ka ardhur koha të ulet në tavolinë, por me drejtësi, ndershmëri për t’i zgjidhur problemet dhe jo për të zgjatur kohën, këtu duhet edhe Evropa të jetë e kujdesshme”, shton ai./TeleshkronjaPost/